La Enfermedad, romance

LA ENFERMEDAD

ROMANCE

Amiga: estaba tumbadu

Cuando recibí tos lletres,

Les que en medio de miós males,

Llácares y pataletes,

M' asentaren muy al cuayu

Y me vinieren de perles,

Pos por tuyes un algaire

Y un cordial afayé n'elles ,

Yo en retornu te debía

Una retafila allegre

Del viaxe de les rapaces

Con so salsa y con so pebre;

Pero, creme, q' aun no esto

Para gastar estes fiestes;

Pos para llances de gorxa

Con dixes y perendengues

Ye menester otru puxu,

Ye necesariu otru temple

Muy destintu del mió humor,

Que me tien fechu un vederre.

Lo que puedo fer agora,

Atentu al estau presente,

Ye con colores paxizos

Y con sombres verdinegres,

Pintáte de mió pelona

Les matuxes y llaceries.

Mas, mira, que non lo fago

Para que te me entristezques

Nin llores como acostumbres;

Si non pa que te entretengues,

Pos fasta de les ortigues

Saquen la miel les aveyes.

Cuantu más que to añadite

Al fin miós convalecencies,

Porque, pos sabes miós males

Tamien de miós bienes sépies.

Vamos, atendi, que empiezo

En sin andar en más xeres.

Mió fía, estó fecho un sacu,

De sapos Y sacaberes,

De escorpiones y alacranes,

Basiliscos y culiebres;

Porque no acabo d' echar

De min, anque lu escorrexe

Un demoniu d' un dolor

Que me fai ver les estrelles;

Y por más que lu conxuro

Está siempre ten que tienes.

Dolor, que ñeciu m' obliga

A facer mil bicoquetes,

Y arrolláme por el suelu,

Tiráme pe les paredes,

Andar á picos picaños,

Y al pizopé angunes veces,

Espernexar, dar corcobos,

Romper sielles y tauretes,

Con otres mil xerigonces

Y doscientes xigomencies.

Dolor, que me fai andar

Fiendo visaxes y mueques,

Los güeyos arremellar,

Coyes agurriar y frente,

Torcer nariz y focicu,

Arregañar bien los dientes,

Esmordigañar los llabios,

A soplar de los dos fuelles,

Esperezáme, vociar,

Y otros doscientes ximuestres;

Q' apuesto una pe de barru

Ye un gusto de Dios el veme:

Dolor tan desesperadu

Que me pon fecho un bederre.

Les quexades se me franchen,

Les vidayes se me fienden,

Sesos y cascu me salten,

Los pelos se me enderecen,

Los costazos se me fundien,

Les costielles se me quiebren,

El cuerpo se me respiga,

Les llágrimes se me suelten.

Dolor, que á naide de Dios

Nin á los perros dolientes.

¡ Dichosu aquel que se viera

Sin mueles, dientes, nin melles!

Pero cuando yo pensaba

Que en aquestes menudencies

El mal se quedaba, entró

Otro d' otres cantaletes

De non menos Ilicantines,

Y de piores consecuencies.

Isti humor ó puzcalabre

Non contentu con facéme

Todos los güesos gañipos

Y toda la boca estielles,

Se m' abaxó al gorgoberu,

Y apretando erre que erre,

Cerróme á rozu y palones

Del pasapan les voleres.

¡ Ay, mió gloriosu San Bras,

Y qué apretures aquestes!

Entós , ya se vé, tomades

Aquelles correspondencies,

La cabeza prevalica,

Pónse amoriau el calletre,

Los güeyos se m' encandilen,

Les palabres non se suelten,

Abrásense les corades,

Los polmones arrebienten,

El corazón s' entrastaya,

Los pulsos se desconcierten:

Todo agüele á concluídu,

Todo á mortiza arrecíende.

Y , mir ' aquí , que el que yera

Un toru con banderetes,

En un dame acá eses payes,

Ya se ve tumbadu n' elles;

Y aquel que gastaba plantes,

Ya non puede facer piernes.

El home que co los güeyos

Tragaba toda la xente,

Agora los tien cuayados

Y tan parades les ñeñes,

Que lo que puede ye solo

Mirar á todos en tientes.

¡ Hay del probe que ñació

Suxetu á tales miseries !

La vida tien en un tris

Y en un si xerve ó non xerve.

Agora yo me feguro

Que tu t' eches estes cuentes:

Que al veme tan mal parau

Todu yo fechu una peste,

Entra el potru-medicatu

Con sos paxes y corchetes

Y , echándose sobre mín

Com' unes utres famientes,

Desalforxando sos chismes

Entre dimes y diretes,

Me esfarrapen á sangries,

Me destocinen á esfriegues,

Me chamusquen con ventoses,

Con baños me despelleyen,

Con xiringazos m' esfonden,

Con supedanios me tueyen,

Con agües me desbauticen,

Con untures me esfelpeyen,

Con emplastos me taracen,

Con gataplasmes me afrellen,

Con parches me destapinen,

Con cantárigues me esfuellen.

Que, dempués de habeme fecho

Un desfolladu paciente

Y esmielgádome pol chiste

A tarrón les faltriqueres,

Me dexen al ventestate

Allá rumiando entre dientes,

Como el que abandona un burru

Metánes é nes xuncleres

A Dios á suerte .y ventura,

A si muerre ó si non muerre.

Pos non, fía , non fo ansi:

Antes lluego que supieren

Miós penuries y miós cuites

Acudieron delixentes

El mélicu y ceruxanu

Dispuestos á socorréme,

Y , como bonos amigos,

Fixeron lo que pudieren.

Diérenme un par de sangríes,

Untárenme con aceite,

Non s' apartaron de min.

Y pa llavar les mexelles

Con yerbatos y mestranzos,

Unos enxuagues fexeren.

Con esto y co la pacencia,

Y con Dios, que cuando quier

De todos los vientos llueve,

Comenzaren afloxar

Del gaznatu los bruchetes .

¡ Oh fia ¡ q ' estadu aquisi

Del otru tan diferente!

Desde entoncia tomo fuelgu,

El espíritu se estiende,

Los conductos se suavicen,

Les entrañes se refresquen,

El polmón se desenrolla,

El pulsu se desencueye,

Pónse fita la cabeza,

Despávilase el calletre

Y, en fin ,todo n ' un instante

Se pon en tonu corriente.

Mas cuando yo maxinaba

Poder entre norabuenes

Salvu de la gorruñera,

Y sanu de carrasperes,

Contentu estar com ' un cucu

Y com' unes castañueles,

Comer com ' un descosiu,

Beber com' un reguilete,

Vuelven los excomulgados

Y maldites de les mueles

( Mal deseñizu les pose,

Males teñaces les vuelen ),

A cantar so palinodia

Faciéndose mui de nueves.

Así ye qu ' estó obligadu

Aguardáme entre mantielles

Fasta q' asiente la sangre

Y los humores s' aquieten.

Con todu , como ayuné

Tantes semanes enteres,

Por más que les mueles chillen,

Por más que á les mueles pese,

Anque rabien y anque griten,

Rebienten y desesperen,

Mamo torrendos d ' á palmu,

Escancio sendos chisquetes

Y paso una vidiquina

D ' un abad ó un presidente.

Pásalo tu bien tamién;

Y Dios permitia que tengues

Xunto co los tos Antones

Unes pascues mui alegres,

Que ansina te lo desea

Aquel amigu de siempre

Que lo fue, lo ye y será

Fasta les Ares, de veres .